#ԱրարատՄիրզոյան #Հայաստան #արտաքինգործեր #անվտանգություն #համագործակցություն
ՀՀ ԱԳ նախարար Արարատ Միրզոյանը Դեկտեմբերի 2-ին մասնակցել է ԵԱՀԿ նախարարական 28-րդ համաժողովին և հանդես եկել ելույթով։ Ելույթի մեջ Արարատ Միրզոյանը մասնավորապես նշել է, որ Հայաստանը պատրաստ է բանակցությունների միջոցով հասնելու Հարավային Կովկասի տարածաշրջանում տևական կայունության։ Նա նաև անդրադարձել է Լեռնային Ղարաբաղի կարգավիճակին՝ նշելով, որ այդ կարգավիճակը պետք է հիմնված լինի ինքնորոշման իրավունքի իրացման վրա՝ ապահովելու տեղահանված հայ բնակչության անվտանգ և արժանապատիվ վերադարձն իրենց բնակության վայրեր՝ Լեռնային Ղարաբաղի ողջ տարածքում։
Դեկտեմբերի 2-ին ԵԱՀԿ 28-րդ նախարարական համաժողովի շրջանակներում ՀՀ ԱԳ նախարար Արարատ Միրզոյանը նաև երկկողմ հանդիպումներ է ունեցել մի շարք այլ երկրների ԱԳ նախարարների և բարձրաստիճան այլ անձանց հետ, այդ թվում՝ ԵԱՀԿ Գլխավոր քարտուղար Հելգա Շմիդի հետ, Լեհաստանի ԱԳ նախարար Զբիգնև Ռաուի, Ղրղզստանի ԱԳ նախարար Ռուսլան Կազակբաևի, Նիդերլանդների ԱԳ նախարար Բեն Կնապենի, Հունաստանի ԱԳ նախարար Նիկոս Դենդիասի, Խորվաթիայի արտաքին և եվրոպական գործերի նախարար Գորդան Ռադմանի, Ավստրիայի ԱԳ նախարար Միխայել Լինհարտի, Ֆինլանդիայի ԱԳ նախարար Պեեկա Հաավիստո Օլավիի հետ։
Հանդիպումների ընթացքում անդրադարձ է կատարվել տարածաշրջանային անվտանգությանն ու կայունությանը վերաբերող մի շարք հարցերի։ Արտաքին գործերի նախարարները քննարկել են երկկողմ օրակարգի ընդլայնման հեռանկարները՝ ընդգծելով բարձր մակարդակի փոխայցերի, արտաքին քաղաքական գերատեսչությունների միջև խորհրդակցությունների ակտիվացման անհրաժեշտությունը։ Առանձին երկրների ԱԳ նախարարների հետ քննարկվել են նաև առևտրատնտեսական ոլորտում փոխգործակցության խորացմանը, ինչպես նաև երկրների գործարար կապերի խթանման և նոր հնարավորությունների ստեղծմանն ուղղված հարցեր։
Կողմերը նաև քննարկել են Լեռնային Ղարաբաղի հակամարտությանը և դրա խաղաղ կարգավորմանը վերաբերող հարցեր։ Արարատ Միրզոյանը վերահաստատել է հայկական կողմի դիրքորոշումը՝ տարածաշրջանում իրավիճակի դեէսկալացիայի և կայուն խաղաղության հաստատման վերաբերյալ։ ՀՀ արտաքին քաղաքական գերատեսչության ղեկավարը նաև գոհունակություն է հայտնել՝ ի սատարումն հակամարտության համապարփակ ու տևական կարգավորման ուղղությամբ ԵԱՀԿ Մինսկի խմբի համանախագահների կողմից գործադրվող ջանքերին։