Կան բազմաթիվ գործոններ, որոնք օգնում են արդյունավետ ղեկավարման հարցում, սակայն որոշ հատկանիշներ իսկապես առանձնացնում են լավ ղեկավարներին: Այդ գործոնները միասին մեծացնում են թիմի անդամների համակրանքը ղեկավարների և կոնկրետ կազմակերպության նկատմամբ:
1. Ունենալ մեծ փորձ և համապատասխան գիտելիքներ
Նախ և առաջ, դուք չեք կարող կառավարել մի բան, ինչին այդքան էլ լավ չեք տիրապետում: Լավ մենեջեր լինելու համար փորձը անհրաժեշտ գիտելիքներ ձեռք բերելու մի միջոց է, սակայն տասնամյակների փորձով ներկայացվող ռեզյումեն միակ լուծումը չէ։ Ռեզյումեի մեջ նշված փորձը առ ոչինչ է, եթե Դուք որպես ղեկավար չեք կարողանում, օրինակ, ճիշտ հաղորդակցվել աշխատակիցների հետ կամ լարված իրավիճակներում Ձեր թիմին ուղղորդել։
2. Կարողանանալ ճիշտ հաղորդակցվել տարբեր բնույթի անձանց հետ
Որպես ղեկավար գործընկերային հարաբերություններ և կապեր հաստատելը Ձեր առաջնահերթ գործառույթներից մեկն է լինելու, ինչը ենթադրում է բավականաչափ փորձ տարաբնույթ անձանց հետ հաղորդակցվելու հարցում։ Ճիշտ հաղորդակցվելու կարողությունը նույնքան կարևոր է նաև ներքին աշխատանքային գործընթացները արդյունավետ կազմակերպելու և իրագործելու համար, որովհետև ղեկավարի և աշխատակիցների միջև ոչ ստույգ հաղորդակցումը կամ հաղորդակցության պակասը կարող են հանգեցնել նաև երկկողմանի սպասումների թյուրըմբռնմանը։
3. Կարողանալ աշխատանքային լարված իրավիճակներում թիմին ուղղորդել
Աշխատանքային լարված իրավիճակները երբեմն անխուսափելի են, նամանավանդ երբ դրանք պայմանավորված են որոշ արտաքին գործոններով։ Ինչպես արտաքին գործոնները, այնպես էլ այլ անհատական կամ մասնագիտական հանգամանքներ կարող են էապես ազդել Ձեր աշխատակիցների կատարած աշխատանքի վրա։ Որպես մենեջեր պիտի կարողանաք անհրաժեշտության դեպքում նրանց տրամադրել հավելյալ տեղեկատվություն և օգնություն հանձնարարված աշխատանքը պատշաճ կատարելու համար։
4. Ունենալ պարզ և մատչելի ձևով հաղորդակցվելու ու բացատրելու ունակություն
Հետադարձ կապի ապահովումը հանդիսանում է աշխատակիցների կատարած աշխատանքը գնահատելու և ընդհանուր աշխատանքային գործընթացը վերահսկելու կարևորագույն բաղադրիչներից մեկը։ Շատ կարևոր է, որ այդ գնահատականը լինի ոչ թե զուտ կոնկրետ աշխատանքի համար տրված գնահատական, այլ միտված լինի բարելավելու տվյալ աշխատակցի կողմից կատարվող աշխատանքը։ Այլ կերպ ասած՝ հետադարձ կապը պիտի լինի կառուցողական, ինչը ենթադրում է, որ բացասականից բացի պետք է նշել նաև աշխատանքի դրական կողմերը։
5. Կարողանալ մշտապես լինել կապի մեջ կարևոր հարցերի կամ խնդիրների առկայության դեպքում
Ցանկացած խնդրի կամ հարցերի առկայության դեպքում աշխատակիցը պիտի իմանա, որ կարող է կապ հաստատել ղեկավարի հետ, եթե անգամ նա կազմակերպությունում չէ։ Դա անհրաժեշտ է առաջացած խնդիրներին կամ հարցերին արագ լուծում տալու համար, նախքան այդ խնդիրները կարող են ազդել ընդհանուր աշխատանքի վրա։ Նման գործելաոճը կարևոր է հատկապես երբ խոսքը գնում է մեծ թիմեր ղեկավարելու մասին: Այդպիսով Դուք կարող եք նաև վերահսկել աշխատանքի ընթացքը և խուսափել անսպասելի հետևանքներից։
6. Կարողանալ առաջադրանքները ճիշտ բաշխել համապատասխան մասնագիտական որակներով աշխատակիցների միջև
Ցանկացած աշխատանք կատարելու համար ղեկավարի համար անհրաժեշտ նախապայման է այդ աշխատանքը թիմի համապատասխան անդամների միջև բաշխելը, այլ կերպ ասած՝ նրանց աշխատանքային համապատասխան գործառույթներով լիազորելը։ Այդտեղ ղեկավարները բնականաբար պիտի հաշվի առնեն աշխատակիցների փորձը, կարողությունները, նրանց պատասխանատվության աստիճանը և մի շարք այլ գործոններ՝ կախված այդ աշխատանքի բնույթից։ Հնարավոր է նաև, որ որոշ դեպքերում աշխատակիցները ունենան թրեյնինգի կամ ուղղորդման կարիք՝ մինչ այդ պարտականությունները ստանձնելը:
7. Մեծ կարևորություն հատկացնել աշխատակիցների կարիերայի զարգացմանը և փորձել նպաստել նրանց մասնագիտական աճին
Յուրաքանչյուր աշխատակից ունի իր կարիերայի աճին ուղղված ծրագրեր, որոնց նա ցանկանում է հասնել որևէ կազմակերպությունում աշխատանքի անցնելուց հետո։ Ղեկավարները նույնպես պիտի օգնեն աշխատակիցներին կարողությունների և փորձի ձեռք բերման հարցում: Աշխատակիցների մասնագիտական աճը նպաստում է նաև տվյալ կազմակերպության գործունեությանը և դրա արդյունավետության բարձրացմանը, քանզի փորձառու մասնագետների օգտակար գործողության գործակիցը շատ ավելի բարձր է, քան նորեկներինը, ինչն էլ բնականաբար անդրադառնում է նրանց կողմից արված աշխատանքի որակի վրա։
8. Կարողանալ ճիշտ գնահատել աշխատակիցների ուժեղ և թույլ կողմերը
Աշխատակիցների մասնագիտական նկարագիրը և որպես մասնագետ նրանց առավելությունները ու թերությունները ճիշտ գնահատելը անչափ կարևոր է յուրաքանչյուր ղեկավարի համար։ Թիմի անդամների միջև աշխատանքային պարտականությունների ճիշտ բաշխումը ոչ միայն օգնում է տվյալ աշխատանքը պլանավորած ձևով իրականացնելու համար, այլ նաև բարձրացնում է աշխատակիցների կատարողականը և նրանց դարձնում ավելի պատասխանատու իրենց իսկ ստանձնած աշխատանքը մասնագիտորեն կատարելու հարցում։
9. Նպաստել թիմային մշակույթի ձևավորմանը և խթանել թիմային աշխատանքը
Արդյունավետ թիմային աշխատանքը և ներգրավվածությունը սկսում են անհատական մակարդակից, սակայն աշխատավայրում թիմային մշակույթի ձևավորման և խթանման մեջ մենեջերներների դերը անչափ մեծ է և կարևոր։ Աշխատակիցների միջև համագործակցությունը և առանձին աշխատակիցների ներգրավվածությունը միանշանակ բարձրացնում է նաև թիմի ընդհանուր կատարողականը։ Անհատական և թիմային մակարդակով աշխատակիցների ներգրավվածությունը նաև օգնում է խուսափել նրանց հաճախակի փոփոխությունից։
10․ Չխանգարել աշխատակիցներին ինքնուրույն որոշումներ կայացնելու ու համապատասխան աշխատանքը կատարելու հարցում
Լավ ղեկավարը պիտի կարողանա ճանաչել հատկապես բանիմաց և փորձառու աշխատակիցների ուժեղ կողմերը և, հետևաբար, խուսափել աշխատակիցներին ցուցումներ տալ ևայդ ցուցումներով խանգարել նրանց կատարելու իրենց իսկ աշխատանքը։ Երբ աշխատողները լիազորված են լինում կոնկրետ աշխատանքի համար համապատասխան գործառույթներով, նրանք նաև պատասխանատվություն են վերցնում այդ աշխատանքի կատարման և դրա արդյունքի համար, ինչն էլ հենց հանդիսանում է նրանց մասնագիտական աճի կարևորագույն գործոններից մեկը։
Նմանատիպ այլ հրապարակումներ
Ինչպե՞ս Բարելավել Թիմային Աշխատանքը
Ինչո՞ւ է Հաճախորդների Սպասարկումը Այդքան Կարևոր Բիզնեսի Զարգացման Համար
Բյուրոկրատիա․ Իսկ Ո՞րն է Այլընտրանքը
"Շատ Աշխատել"— Խորհուրդ են Տալիս Հանրահայտ Մարդիկ